政情：搞搞政：擴膠袋稅邱騰華出醜

膠袋徵費搞咗兩年，原本想叫人用少啲膠袋，出街買嘢就記得用環保袋，殊不知就令含有塑膠原料嘅不織布袋充斥市面。立法會尋日傾擴大徵費計劃，十幾個團體同聲炮轟政府做嘢做一半，只靠收費，唔做好源頭分類同回收，最終都係搞到一鑊泡。

環境局局長邱騰華出席前一早做好準備接招，話說人民力量嘅議員「大舊」陳偉業不滿邱局長成日頭痛醫頭、腳痛醫腳，逼局長就立法強制源頭分類表態，仲話香港人均垃圾量係台灣同韓國的兩倍，兜口兜面問局長：「政策你訂嘅，你知唔知醜？」搞到邱騰華忍唔住反擊話：「我知你成日想撩慶我！」

雖則係咁，但大舊喺會議期間亦多次打斷邱局長嘅回答，搞到邱局長唔係幾高興，最後惟有由委員會主席陳克勤叫大舊畀時間局長講，局長先順利答到想答嘅嘢咋！