政情：民主阿婆惡搞康叔險失勳

不甘寂寞嘅「民主阿婆」陳方安生，失驚無神就會跳出嚟就政經大事指指點點，慌死蝕底。前全國人大吳康民尋日喺佢最新嘅個人口述歷史著作中仲爆料，話民主阿婆曾經否決佢喺一九九八年攞大紫荊勳章。

話說當時由民主阿婆領導審議小組決定授勳名單，當時只係提咗四個大紫荊人選，除了康叔外，仲有當年機管局主席黃保欣、「體育沙皇」沙利士同「娛樂大亨」邵逸夫。

康叔話當年小組成員鄔維庸喺審議後曾向佢通水，話因為民主阿婆反對佢攞「荷蘭水蓋」，四人名單中只有佢不獲通過，原因係佢係唯一有爭議嘅人物，據說民主阿婆當時仲話「呢啲校長大把啦」，康叔當時知道後都覺得無話可說。

老董補番狠摑民主阿婆

正所謂「政治一日都嫌長」，後來形勢逆轉。據講，當年老董認為康叔為香港回歸長期付出好有貢獻，一錘定音將佢嘅名補番落去。咁即係否決咗民主阿婆嘅決定喇！康叔就笑言呢個大紫荊勳章係失而復得，而事實上，社會上對康叔受勳冇乜爭議，反而後來就對已故嘅前工聯會會長楊光獲勳就冇咁客氣喇，而且社會上反對聲音都唔少。

最近期康叔提出嘅「鐵三角論」喺政壇掀起熱論，佢喺最新著作中當然有印載呢篇文章。此外，佢更首度披露，佢曾經認為前教統局局長李國章係可以競選特首，因為對方「夠硬淨、夠膽識」。至於前教統局常秘羅范椒芬，佢認為羅太有工作能力，本來可以做多幾年，但對方為人直率硬朗，有時講嘢唔夠婉轉易惹火喎！

被問及下屆特首人選，康叔尋日喺新書發布會上，寄語參選者要有承擔，而非獲取利益嘅「抽水」之人；佢又提到中央睇唔通香港今後發展嘅前瞻性，所以好多後遺症逐步浮現，暴露好多政治問題。至於特首選舉嘅最新動態，康叔尋日出席活動後至少三次叫大家睇佢今日喺《東方日報》嘅「以文會友」專欄，大家要密切留意喇！