短打長擊：死撐下去只會風中折枝

煲呔曾剛愎自用，這從他許多言行中可以見到，包括不理社會輿論強推擴大問責制，結果搞到七國咁亂；而一旦出事，從來沒有人要問責。向來視民望如浮雲的煲呔曾，果然求仁得仁，民望衰到貼地，之不過佢又「跌落地抓把沙」，說政府民望低是被立法會民望拖累。

自己施政無方，管治風雨飄搖，臨收工依然未能反省己過，畀人狂呼下台，依然面不紅氣不喘要Hea到最後一分鐘！唐太宗說過：「天子者，有道則人推而為主，無道則人棄而不用，誠可畏也。」煲呔曾無所畏懼，是以倒行逆施習以為常，口就話民心我心、急市民所急，但佢真正為市民做過乜嘢？

煲呔曾的所作所為，讓人睇到佢嘅「香港仔心態」，一味要賺到盡。

香港回歸十四年，貧窮人口有增無減，政府何曾有為百姓謀幸福的決心？通脹如虎，樓價飆升，中產上唔到車，基層市民又怎可能上車，是以復建居屋已是全民共識；可煲呔曾一味死拖，說十月施政報告會交代有關問題，又暗批行政會議召集人梁振英藉攻擊政府「抽水」。倒戈相向者，除了豁出去嘅振英哥，還有向來較溫雅嘅張炳良，煲呔曾何以只見「抽水」而不見自己嘅過失？

眾叛親離，內外交困，卻要Hea到最後一分鐘，網民自然鬧爆：曾蔭權在位多一日，香港市民受苦多一日。政令不行，人心思變，煲呔曾既然鍾情於浮雲，理應學浮雲的飄逸，不應再死撐，在民眾的怒吼聲中，即使剛強如樹幹也會折枝倒塌，傷人害己不如學會放棄！