SUN世代：真心入魂煮出正宗拉麵

我為麵狂！年僅二十六歲的鄧振豪（Chandler），原任職保險經紀，為了追尋一碗傳統的日本拉麵，他毅然走出冷氣房，跳入熱辣辣的廚房，創業開設「豚王」拉麵，「好多朋友都話喺香港食唔到一碗傳統嘅日本拉麵，我好鍾意食拉麵，我希望所有香港人都可以食到一碗正宗、傳統嘅日本拉麵！」他更主張「真心入魂」，以真心融入靈魂，真誠為客人送上「傳統」的拉麵。

鄧振豪的爸爸鄧慶治是佳能高級副總裁，而自小在新界圍村長大的他，思想傳統，凡事堅守傳統做法！他喜歡「搵食」，最愛到日本旅行，極欣賞日本的美食及文化，他慨嘆在香港難以嘗到一碗有傳統風味的日本拉麵，於是他挑戰難度，誓要做出一碗正宗日本拉麵。

為把最正宗、最傳統的拉麵帶來香港，他特別到日本邀請拉麵師傅生田智志來港相助，而材料也堅持要與日本正宗拉麵相似：「喺香港真係好難做到有傳統風味嘅拉麵，因為水質唔同，日本啲天然水一開水喉就飲得，但香港就唔同，為咗更接近日本嘅水質，我哋選用鑽石水，呢個水質係最接近，我會用盡辦法保持「傳統」，又成日飛去日本試吓其他拉麵！

湯底唔靚唔賣

Chandler對拉麵要求甚高，堅持每日限售二百五十碗，確保品質：一碗好拉麵最重要係湯底，我哋每日用五十斤豬骨煲二十二個鐘，啲湯唔會放過夜，而分量啱啱係做到二百五十碗拉麵！叉燒會用紅酒浸過，拉麵會用生麵，每日新鮮製造！我好嚴謹，有日個湯做得唔好，就決定唔開門做生意，我唔想啲客人排得咁辛苦，但食唔到最好、最正宗嘅拉麵！」

深受日本傳統飲食文化影響的他，凡事以客為先，還與主廚生田師傅創立「真心入魂」口號（解作以真心融入靈魂，以真誠服務客人）及在店內貼出「社訓」，鼓勵員工必須「以客為先、為客人營造驚喜及快樂」！為了炮製驚喜，每逢有客人光顧及結帳，他與員工都會大叫口號，先聲奪人。他又經常瀏覽飲食網站，檢視評語，看到有人讚賞他的拉麵好食，即大感欣慰，但看到負面評語時，亦會欣然接受，讓他知道有改進的地方。

名人排隊幫襯

「豚王」拉麵享負盛名，高峰期吸引逾三百人排隊等食，客人閒閒地要等候二、三小時，出名到連李嘉欣、許晉亨、葉澍堃、何麗全及王冬勝等名人也排隊幫襯，「名人麵館」美譽當之無愧！Chandler感觸地說：「我哋個廚房咁細，又限量出產都咁成功，真係好好彩！好開心有班好嘅日本師傅，同埋咁多朋友支持。」現時他正計劃開設分店及中央工場製作湯底，逐步拓展其拉麵王國，堅持「真心入魂」向香港人推廣傳統日本拉麵。

Chandler's Profile

婚姻狀況：未婚

學歷：澳洲Monash University工商管理學士

興趣：玩音樂、旅遊