政情：工商界國情班組同學會

一班工商界專業人士喺數年前開始返北京上國情班，修讀中國國家行政學院為期一個禮拜嘅課程，後來就讀人士愈嚟愈多，於是就喺今年五月八號成立同學會。

尋日同學會舉行首次研討會，獲唔少同學捧場，當中不乏知名人士，包括李嘉誠基金會董事洪小蓮、民豐企業主席楊梵城、中銀國際副執行總裁謝湧海、證券學會會長李細燕等，其中謝湧海同李細燕更加係副主席。

首任主席係證券業協會前會長李耀新，佢話國家行政學院屬省部級培訓機構，係研究中央政策嘅基地，唔少高官喺學院培訓，○八年工商界亦返去學習。成立同學會目的係希望集合一班工商界專業人士，將來為一啲政策發表意見。依家已有四屆畢業生，第五屆亦即將畢業，共有百幾名會員。

冇見洪小蓮一排，風采依然，佢近期都係忙公職，出席研討會之前啱啱喺房協開會。謝湧海尋日仲擔任演講嘉賓，講人仔國際化嘅商機，有人問佢QE3或會出台，係咪應將手上港元換成人仔？佢話相信美國會繼續印銀紙、發債，美元貶值，港元同美元掛鈎，一定會有影響，但係咪要將港元兌成人仔，就要「自己判斷」喇！