政情：搞搞政：鄉局新大樓漏水 劉業強執手尾

耗資近二億元興建嘅新界鄉議局大樓外觀金碧輝煌、建築宏偉，設計古色古香，之不過內部嘅手工，就認真麻麻喇！

早前已有鄉紳私下講簷篷做得唔夠出，搞到落雨時雨水會沿住牆身滲落嚟，水漬就留喺牆身，有鄉紳大呻水漬似眼淚，一行一行咁留喺鄉議局，唔怪得搞到風雨飄搖啦！

通道亦有積水

由於大樓係開放式設計，每逢打風落雨都會整濕大樓通道，本來呢個都係預計之內，只要將地板整到斜斜哋就可以去水，但近日竟然發現通道有積水，最大鑊係連大劇院嘅舞台竟然都因為漏水而需要盡快重鋪，工程暫定八月底至九月初做。唉！勢估唔到新大樓開幕冇耐就搞成咁，都咪話唔驚。

聽講，唔少鄉紳其實一直都對新大樓建築工程專責委員會召集人兼鄉議局副主席林偉強嘅表現好不滿，今次仲搞到要新大樓管理委員會主任委員劉業強幫佢執漏添，負責跟進舞台重鋪工程，認真抵鬧。