政情：李明逵唔想受老細壓力
衞生署出書教大家點樣面對退休生活，退休幾年嘅前警隊一哥李明逵獲邀分享，佢話退休人士心理上嘅適應好重要，尤其係執掌高位嘅人，更要明白在位時所得到嘅支持或享受嘅待遇，一旦離開崗位就會全部消失。前一哥呢番說話真係啱晒就嚟落台嘅煲呔曾聽。
輕鬆做義工 頭髮都黑番
李明逵坦言，雖然佢做處長嘅時候已為退休做準備，但喺退休初期仍然改唔到警隊工作嘅習慣，一聽到社會有事發生就會好肉緊，所以要經常提醒自己已經唔係一哥喇！咁會唔會出山搵真銀？佢話自己開支唔多，份退休金已經好夠使，況且擔任受薪工作會有嚟自僱主嘅壓力，倒不如得閒做吓義工，輕輕鬆鬆，連頭髮都黑番啲。
李明逵（左）同衞生署醫生文麗（右）推介衞生署嘅新書，教人做好退休前準備。