政情：泛民作勢向蘇錦樑施壓

喺下個立法年度，競爭法勢必成為泛民主派同建制派角力嘅新戰場，支持法案嘅泛民同反對法案嘅商會及大部分功能組別議員，各自私下同公開發功。尋日先有香港各界商會聯席會議刊登全版廣告，要求撤回競爭法，而泛民則計劃聽日向商務及經濟發展局局長蘇錦樑施壓，要求政府一定要如期明年通過草案。

據聞今次泛民同蘇錦樑會面，政治姿態多於實際，眼見近日各大商會不斷跳出嚟反對法案，蘇錦樑同泛民分享過佢嘅擔憂，於是有聽日嘅會面，證明支持競爭法嘅大有人在，泛民仲打算會後發表聲明，力爭明年要通過草案，絕對唔可以撤回。

商會近月不斷叫價，要求法例「剝晒牙」為止至心息，但泛民認為，任何削弱執法效果嘅修訂都唔會接受，佢哋又擔心，距離本屆立法會任期完結只有一年時間，但審議法案進度太慢，怕最終會胎死腹中。