政情：新立會路路不通玩謝示威者

前日惜別立法會大樓後，焦點當然落喺搬去添馬艦新大樓啦！雖則係咁，原來搬新屋表面上好似風平浪靜，其實內有暗湧。

喺早前嘅內務委員會特別會議上，議員先鬧完將來要穿過新政府總部至去到立法會新大樓，示威區整得又細又衰，一旦再有七一遊行呢啲咁多人嘅時候，現時兩條由金鐘入添馬艦嘅天橋太危險。

連接配套牙煙迂迴

十六名議員尋日實地睇完後，職工盟立法會議員李卓人喪插指，將來遊行人士要經天橋入添馬艦，行親天橋自不然要上樓梯或自動電梯，大家都想像到一旦多人起嚟，有乜差錯就會好危險o架喇！連親建制嘅經濟動力嘅梁君彥都話，人數多嘅時候真係封路先掂，淨係靠畀兩條天橋唔得o架。

亦有議員不滿既然行政、立法獨立，點解去新大樓一定要先經新政府總部呀？亦有意見話由金鐘港鐵站行入去，條路有啲斜，唔係幾方便坐輪椅嘅人，仲有示威區干擾咗議員出入，人多起嚟管理又有困難。有議員建議不如喺中信大廈起條橋直入新大樓，點知政府話要經研究、諮詢同刊憲等程序，起碼都兩年喎。

班議員講到新大樓好似路路不通咁，點搞先？主責添馬艦嘅行政署署長麥綺明梗係吟詩都吟唔甩啦！萬一激到班議員賴死唔肯搬，到時盞變成全城笑話，時間剩番唔多，睇嚟佢晚晚戙高床板都要諗掂佢。

不過，講番轉頭，立法會行政管理委員會都有份(目及)實添馬艦，點解會等到今時今日至出聲呢？佢哋都有責任o架嘛。有議員就反咬政府遲遲至肯交代添馬艦嘅細節安排。

呢次真係公說公有理、婆說婆有理，但邊個最着急？除咗麥綺明之外，睇怕係煲呔曾，事關班議員唔收貨又唔肯搬嘅話，佢想喺新大樓宣讀施政報告就會泡湯。