SUN世代：絕世好爸棄高職建愛B王國

寶貝仔的誕生，令好爸爸甘願放棄夢想，為他創立嬰兒王國。擁有金融碩士學位的白洋（Brian），曾於多間跨國投資銀行出任要職，兩年前首名愛兒出生，有感本港好質素的嬰兒用品選擇甚少，於是毅然辭去高薪厚職，創辦嬰兒用品店，遠赴歐洲各國搜羅最佳質素的嬰兒用品：「囝囝令我感受到父母都希望給予子女最貼心、無微不至嘅愛護，希望我可以為一眾『初哥爸媽』帶嚟最好嘅BB用品！」

Brian的父母都曾任金融業高層，在金錢世界闖蕩數十載，「可能係爸爸媽媽遺傳或者薰陶，我由細到大對數字都特別有興趣，數學成績亦都係最好，自細嘅夢想係做銀行家，仲要做到好高級！」他十八歲時負笈英國，於當地完成金融大學學位後，回流本港擔任滙豐銀行的見習行政人員，兩年多後又到英國攻讀金融碩士，回港後隨即進軍投資銀行界。

當投行副總裁唔辛苦

獲聘於著名投行摩根大通的Brian，憑着努力與才能，在短短數年間躍升至高層。眾人皆知做i-Banker工作量及壓力驚人，但他卻樂在其中：「咁快做到副總裁，好有成功感。因為做嘅嘢係自己興趣，所以一啲都唔辛苦，仲覺得好開心！」

直至○九年，這位金融才俊遇上人生及事業的轉捩點—第一個寶寶Andreas出生。與太太照顧愛兒的經歷，令Brian深深感受到嬰兒產品質素的重要：「我同太太都冇照顧BB嘅經驗，湊囝囝時成日撞板，發現優質安全嘅產品，可以令父母照顧BB時更得心應手同放心，而且我哋好錫囝囝，好想畀最好嘅產品佢用！」

但本港的嬰兒產品大多來自日本，選擇甚少，並不符合Brian的要求，他惟有與太太專程遠赴歐洲購買高質素的嬰兒產品，有時又要麻煩居於歐洲的朋友，代購產品並郵寄到港，費時失事。後來他得悉許多父母都面對缺乏選擇的問題，於是他決定放棄收入豐厚穩定的投行工作，創立嬰兒用品商店，到歐美澳紐搜羅最新、最優質的高級嬰兒及孕婦用品。

爭取代理權過程艱辛

Brian的創業故事背後，曾碰上不少辛酸挫折：「賣BB用品同做i-Bank係完全唔同嘅工作，要花好多時間適應同克服困難。以前打工只要做好自己嗰part就肯定有回報，創業就要兼顧晒所有嘢，但未必有錢賺。而且我哋引入嘅都係外國嘅top brands，自己用咗好大努力去準備至爭取到代理權！」雖然創業過程艱辛，但他仍深感值得：「我哋嘅理念係Bring the very best to new parents，我嘅工作可以為『初哥爸媽』帶嚟最好嘅BB用品，真係好有滿足感！」

Brian's Profile

婚姻狀況：已婚，育有兩子

學歷：英國艾克斯特大學金融投資碩士

現職：Cosmo Beebies創辦人