政情：李寧送認股證止血挽人才

烏雲蓋頂嘅李寧不斷成為基金同大行掟貨嘅目標，但最傷莫過於五月份內部高層突然起飛腳，三位高層包括當時嘅首席運營官郭建新請辭嘅消息曝光，令股價一沉不起。經一事長一智，李寧不惜向高級管理人員發認股證兼獎勵股份，務求穩住人才。

張志勇增持 股價反彈

李寧尋日向公司八位董事、十五名高管送出合共669.9萬股可供認購嘅購股權，行使期為六年之內，行使價每股9.896元。邊啲人才李寧想Mark實？重點就梗係行政總裁張志勇，佢嗰份最重手，有成83.67萬股購股權，但佢都好識做，喺上個禮拜當李寧被澳洲聯邦銀行同摩根大通清貨，合計套現逾1.24億元之時，張志勇亦一連五日以每股平均價9.115元至10.38元不等，增持公司股份至1.1%，令公司股價昨日趁機反彈4.464%，收報9.36元。

其次係首席財務官鍾奕祺，佢有70.68萬份。有五位非執董及獨立非執董都獲分認股證，數量均等，一律20.9萬份。公司都好重視其他管理人員，今次同時向七十二位管理人員，送咗164.7萬股獎勵股份。呢批認股證之中，部分係同公司業績掛鈎，並會由明年七月一日起連續三年，分三批畀佢哋行使，換言之，想集齊認股證，起碼要做多三年。