政情：逾百新舊議員立會惜別

立法會尋日舉行惜別立法會大樓儀式，逾百位前任、現任議員出席同大樓講再見，場面盛況空前。年紀最大嘅前任議員係九十八歲嘅杜葉錫恩，仲有九十二歲嘅王霖，但八五年嘅立法局首席議員鄧蓮如就冇出席呢次歷史性嘅聚會。

疑似特首候選人范徐麗泰同政務司司長唐唐，由於都係前立法機關議員，所以可返來惜別。范太以前任主席身份發言時話，日後新立法會大樓同政府總部毗鄰而居，希望行政同立法機關多啲交流，又話無論做官或做議員，其實都係想為市民服務，引起全場掌聲。唐唐就臨時報名現身，但冇公開講嘢，只係坐番喺自己嘅舊座位緬懷一番。

喺九七年回歸前一星期，當時嘅立法局議員將五十幾件物品放喺時間囊，埋在立法局停車場地下，尋日時間囊出土，梁耀忠就攞番當年放入去嘅「臭罌」同「臭草」。

至於已故前議員司徒華，當年將九七年平反六四動議罕有獲通過紀錄本放入時間囊。何俊仁慨嘆，華叔離世後，獲通過的六四動議「出土」，但六四至今仍未平反。