政情：搞搞政：林健鋒「五水」妙論財委會

呢幾日政圈熱論「抽水」，究竟政治人物講嘢有冇抽水成分？話說立法會財委會尋日最後一次喺立法會舊大樓開會，審批十億多元嘅跑馬地蓄洪池工程，以防落大雨期間發生水浸，經濟動力立法會議員Jeffrey林健鋒唔知有意定無意，問跑馬地嘅抽水工作係咪抽得唔好，所以有水浸？渠務署署長陳志超啱晒嘴形話跑馬地冇抽水站o架，只係讓雨水由高流向低，將來就流落個池度，然後抽出大海。工程界代表何鍾泰即時要求更正，話嗰啲叫泵水，唔係抽水。

跟住Jeffrey打趣話財委會已成為「五水」會，即係「攞水、吹水、抽水、睇水、放水」囉！佢事後講笑話政府上財委會「攞水」，會議就畀機會議員「吹水」討論「抽水」，身為財委會主席嘅劉慧卿就要「睇水」，到最後咪又係「放水」批錢畀政府。

不過，佢講漏咗兩樣，就係會議未完佢就提早「潛水」走人，仲有係借蓄洪池「抽水」搞爛gag。