政情：李國寶鬼祟調位續做懶蟲
每年班立法會議員出席率埋單計數，大懶蟲議員排行榜中，霍震霆同李國寶例必係座上客，兩人不時爭一日之長短。
遲啲立法會搬家之後，佢兩條大懶蟲被編配坐埋一齊，但尋日立法會又出咗張通告，話李國寶已經申請咗同「金勞詹」詹培忠調位。按照最新座位表，李國寶由死角位調到最前排，代替金勞詹同旅遊界謝偉俊一齊坐。
金勞詹透露原來係李國寶唔想同霍公子一齊坐，費事兩個一齊唔開會，出現兩個空位嘅場面。不過，分開坐就改變到現實咩？將來李國寶坐前排，唔開會仲顯眼。李國寶確係掩耳盜鈴，最慘係謝偉俊同金勞詹一齊坐得好哋哋，未來一年就被李國寶拆散咗。