政情：港府紐約辦當議員冇到

話說立法會海濱規劃事宜小組委員會喺今年四月尾至五月頭遠赴美加考察，睇吓當地嘅海濱規劃，點知特區政府駐紐約嘅經濟貿易辦事處，斗膽怠慢咗班尊貴議員喎！

劉秀成狂轟黃公公

商務及經濟發展局常秘「黃公公」黃灝玄尋日出席立法會財務委員會，為駐海外經貿辦申請租金津貼撥款。專業會議嘅議員劉秀成身為美加團團長就當面投訴，點解唔同地方嘅經貿辦，竟然有唔同接待方法？佢先大讚加拿大嘅職員招呼周到，唔單止熟悉當地情況，全程仲幫到佢哋唔少忙。

跟住佢開始勁踩駐紐約嘅職員，大鬧對方反應冷淡，連立法會嘅秘書都驚奇，呢位職員點解咁唔幫得手。搞到成個考察團咁不滿，佢冇法子唔做番啲嘢，仲話佢吩咐咗副團長「大舊石」石禮謙了解吓，於是大舊石就打畀呢位職員，好婉轉咁話佢哋有少少「homesick（思鄉病）」，潛台詞即係叫對方關心吓考察團，點知對方仍然冇乜表示。

劉秀成仲話實情佢就大人大量，冇乜所謂，之但係成團人去到盛意拳拳，點知對方冇晒影咁，所以團員要佢譴責呢位職員。連冇份去美加嘅「長毛」梁國雄都睇唔過眼加把口鬧，雖則議員唔係有特權，但連議員去到都係咁嘅態度，如果係升斗市民求助，結果係點可想而知。

被鬧到頭耷耷嘅黃公公惟有死撐，話每次立會有外訪團，當地經貿辦都會同立會秘書處傾傾有乜幫到手，無論酒店、交通定行程，幫到嘅都會盡幫；只係經貿辦始終主責經貿，人手又唔多，所以有時未必樣樣議題都幫到手咁囉。