SUN世代：科網先鋒IT傳善心

「究竟你做咗啲乜去幫個社會？」一次比賽，一條尖銳問題，一次落敗經歷，令IT界年輕才俊方保僑（Francis）徹底改變，從滿足於工作成就的小伙子，蛻變成熱心公益的賢達，決心以專業知識回饋社會，燃亮他人。

一部小小的電子手帳，不但記錄了各樣數據資料，更記錄了Francis的成功故事，「56k modem、PDA，到之後嘅WiFi技術，都係首先由我引入嚟香港。」年紀輕輕，Francis就憑獨到眼光及專業知識，在資訊科技界打響名堂，伴隨各種電子產品而來，是名成利就。

少年得志，Francis對自己的成就亦甚為滿意。因此，當友人於○○年提名他參加IT界傑出青年比賽時，他充滿信心，「嗰陣覺得自己幾叻，喺IT方面都叫有啲成就，對比賽都幾有信心。」但面試時，評判一條問題，卻重挫Francis的傲氣，「個評判問我：『你有冇參與啲乜嘢社會事務，有冇做啲乜去幫個社會？』嗰刻我唔識得點答，因為嗰陣我喺社會事務方面完全係一片空白。」

評判的問題，猶如當頭棒喝，比賽結果公布，Francis落敗，但卻令他找到全新路向，「雖然輸咗，但係失敗令我明白，一個人嘅成就唔單只取決於工作上嘅成就，仲包括佢對整個社會嘅貢獻。」由那刻起，他開始投身公益事務，短短十年間，他不但成為三個商會的會長，更擔當起多項政府公職多間非牟利機構顧問。

成功秘訣：今天的事今天做

「唔同界別嘅人都有機會用到科技，我希望利用自己呢方面嘅知識幫人。」科技對社會愈加重要，Francis亦決心以此作平台，回饋社會。他既為小型慈善機構於網上宣傳，協助籌款，亦向不同界別人士舉行講座，助他們把科技融入工作。

公職愈做愈多，Francis卻從不擔心時間不夠用，秘訣在於「今天的事今天做」，「啲人成日話好多嘢做，唔夠時間，只係因為佢哋將啲嘢逼到deadline前先做；我嘅做法就係有嘢就做咗先，唔會堆積落去。」時間管理有方，他準備投放更多心力於公益事務，「梗係趁依家仲有心有力嗰陣做多啲，唔通等老咗先去幫人咩！」

在社會及公益事務上終有所成績，可有想過再度挑戰IT界傑青？Francis笑言自己早已「超齡」，無法再參賽，「過咗四十歲，唔再係青年喇！而且對我嚟講，有冇獎根本唔重要，幫到人先最緊要！」

Francis's Profile

婚姻狀況：已婚，育有一女

學　　歷：香港理工學院（現名香港理工大學）

公司秘書及行政專業文憑

現　　職：Synergy Technologies （Asia） Limited 總經理

社會事務：香港互動市務商會創會會長、香港資訊科技商會會長、香港資源中心創辦人、職業安全健康局（電子及通訊行業安全及健康委員會）主席