政情：鄭詩韻兔B擺百日宴
榮文蔚表妹鄭詩韻今年四月誕下一子Ashton Jack（陳熙鈺），榮升兩子之母嘅佢原本無打算為細仔擺百日宴，但為咗公平起見，上周五筵開十二圍酒席，宴請親友，當中關心妍同許晉亨嘅外甥郭永亮都係座上客。鄭詩韻話：「大仔有擺百日宴，無理由細仔唔擺，依家湊兩個都好辛苦，同埋已經返工，不過出埠做嘢都會盡量縮短時間遷就照顧佢哋。」百日宴係咪收到好多禮物？佢話：「其實大仔嗰年好多禮物都未拆，好多朋友好識做送人情，唔驚浪費，我同老公就送咗一份基金畀Ashton，如果通脹唔太厲害，應該可以夠佢大學讀書用。」Ashton屬兔仔，宴會用上很多氣球做嘅兔仔裝飾，關心妍向來喜歡小朋友，席間仲抱住鄭詩韻嘅大仔合照。
鄭詩韻一家四口合照。