政情：抽水論范太暗寸煲呔曾
煲呔曾早前喺立法會答問大會度話有人「抽水」批評政府，行政會議召集人梁振英隨即反擊。不過，全國人大常委范徐麗泰尋日出席活動時話，自從「抽水論」出街已經有人出嚟否認，佢就覺得好無謂，因為都係口舌之爭，抽唔抽水佢都唔識講，仲話大家都係為香港人服務咁話。
至於邊個抽水，范太就話「好似唔關我事」，皆因自己唔係香港公職人員，又唔係香港建制內嘅人，更唔係現屆政府團隊中人。不過佢話自己講嘢都會比較小心，因為佢係人大常委身份，費事講咗啲嘢引人誤會喎。
佢仲話香港人好聰明，唔會因為人哋講多幾句、講少幾句就受影響，又話：「市民要啲咩好清楚，參政嘅人如果到目前都唔知市民要啲咩，可以摺埋喇。」
唉，好心煲呔曾就檢討吓，咪淨係識得話人，老老實實為市民做嘢好過喇！