政情：搞搞政：季詩傑忽然IT想做選委

雖然季詩傑已退出社民連，暫時係無黨派人士，但佢對選舉仍念念不忘，早前有傳佢會再次參選區議會，但其實佢已另有打算，諗住「升呢」參選年底嘅選舉委員會選舉，喺特首選舉中投票，不過本身係律師嘅佢唔係從法律界出選，而係去大纜都扯唔埋嘅IT界。

阿季自爆早排已登記成為IT界嘅選民，自然有資格參與選委，至於點解「忽然IT」，佢強調自己曾係互聯網專業協會(iProA)成員，所以都算係半個IT人。但係泛民主派嘅莫乃光就話未聽過季詩傑想做選委，近排亦冇同佢接觸，至於泛民喺選委會搶位，佢話唔會嫌多，只要係泛民嘅人就得，現時亦煩惱緊點樣先湊夠數，組成一個三十人嘅名單。

其實阿季都係律師，大可以去選法律界選委，但點解佢反而要轉戰IT界呢？有法律界人士透露，話班選委大部分都係公文袋人士，一向自己玩多過受埋其他人玩，而且全部都係大律師，唔係律師，所以同佢一向冇乜聯絡。