政情：田二少唔執鼠王芬二攤

因「懲罰選民論」而噏出禍嘅立法會九龍西議員「鼠王芬」梁美芬，家下真係心慌慌，事關十一月區議會選舉同明年九月立法會選舉就快殺到，選情肯定有影響。

喺○八年，田北辰揸住富貴黨支旗去九龍西參選，佢同鼠王芬同時向西環尋求支持，雙方一度拔河，各不相讓，結果田二少獲得一萬三千幾票，輸畀鼠王芬近七千票，西環將選票畀咗邊個，一睇就明。田二少落敗後掙扎咗一輪，至決定落腳新界西。如今鼠王芬「懲罰選民論」幾乎令自己一鋪清袋。所以，有分析話田二少明年若再戰九西，機會比○八年好好多。唔知田二少依家有冇「呻笨」？

問過已「改嫁」入新民黨嘅田二少會唔會轉區，佢話「好多謝呢啲分析」，但都未講明年立法會會去邊區參選，總之一句專心做好地區工作。但佢嘅黨主席葉劉淑儀就為佢封晒後路，斬釘截鐵話新民黨唔會做機會主義者：「唔可以等人撞板就走去搶位……要我哋新民黨執鼠王芬二攤，呢啲唔係大丈夫所為，講出嚟都唔好聽！」