政情：冼博德同視障童踢波

由渣打贊助嘅「利物浦亞洲之旅二○一一」，上周三喺廣州展開序幕，同廣東日之泉上演一場表演賽。雖然渣打集團行政總裁冼博德（Peter Sands）係另一英超勁旅阿仙奴粉絲，但喺慈善項目上同利物浦都有共同理念。表演賽舉行前嘅上晝，利物浦球員同一班視障小朋友練習踢足球，冼博德同經典射手魯殊（Ian Rush）都有出席，同小朋友打成一片。

因視障小朋友用一般足球踢波有困難，因此需要特製有響聲嘅足球，等班小朋友用聲音辨別足球方向。冼博德笑指閒時會同小朋友踢足球，但技術就難以媲美該行贊助嘅利物浦。

作為國際銀行嘅行政總裁，冼博德行程非常緊密，上周初到埗深圳就同員工見面，之後到廣州主持酒會，同逾百名來自中港兩地嘅嘉賓同埋利物浦球員會面，翌日又要同視障小朋友練波，緊隨仲要上京。

冼博德難得的是忙裏偷閒，觀賞利物浦嘅廣州之旅表演賽，而利物浦以四比三擊敗日之泉都算交足功課。