政情：掃黃騎劫鳳姐吸票 白鴿選舉賤招冚旗

因為陳家偉一次「香檳尋歡記」，令白鴒黨搖身成為政壇大水塘，但唔係指佢哋財政充裕，而係指連日成為建制派嘅「抽水」對象，尋日連泛民嘅人民力量亦抽埋一份。

所謂「抽人水時、亦被抽也」，向來言論出位嘅李偉儀喺網上預告，話白鴒黨次次選舉時，都會利用性工作者作為吸票工具，猛同街坊講，個黨會要求警方大舉掃黃，多年來街坊都非常受落，認為白鴒掃黃有功。不過好衰唔衰，陳家偉事件令白鴿黨遍地哀鴻，萬一白鴿再次喺選舉前夕大打「掃黃牌」，一定會被街坊群起而攻之，一眾性工作者亦會好唔妥，所以李偉儀先出口術，叫大家金睛火眼睇實白鴒一舉一動。

眾所周知，人民力量狂轟白鴿黨喺政改方案一役轉軚，講到明會喺嚟緊嘅區議會選舉狙擊白鴿黨，而李偉儀喺網誌咁講，擺明都係借陳家偉狙擊白鴿黨啫！咪又係泛民之間鬼打鬼。

街坊對「香檳尋歡記」反感

之不過，早前曾捲入性醜聞嘅「維園阿哥」任亮憲，就冇再評論陳家偉一事。佢今次答得好醒目，先話白鴿黨已經向陳家偉作出「家訓」，又話陳家偉已經冇咗份工，算係對個黨有交代，所以佢唔會棒打落水狗，狙擊白鴿黨從來都只係政治問題。睇嚟維園阿哥吸取過上次經驗，深知桃色醜聞有幾傷。

有白鴒黨中人話自從被爆出「香檳尋歡記」後，本以為對黨嘅傷害唔大，因為陳家偉只係一個黨職員，根本唔算得上係政治人物。但原來班街坊唔係咁諗，班白鴒中人落區收一收風，除咗中產地區有較正面反應外，大部分基層街坊都非常負面，覺得佢哋喺出面亂搞男女關係，而且唔止一次，實在好難唔誤會佢哋。　　

呢位白鴿中人話因為今次陳家偉真係斷正，所以只可以用壯士斷臂一招，同佢劃清界線，但之後可以做乜嚟挽救黨譽，班大佬就仲未諗到啦。