短打長擊：留下一攤爛泥

最新民調顯示，港人對民生狀況不滿程度創下十九年來的新高，煲呔曾政府不如董建華政府昭昭明甚。

何以政府坐擁逾二萬億元外匯及財政儲備，人均財富居於世界前列位置，卻對基層生活困苦視而不見？大家只要見到煲呔曾向來剛愎自用、不聽民意便知。好像解決居屋問題，各界老早要求政府增建公屋及復建居屋，可是政府就一味借聾耳陳隻耳睬你都傻；然而，北大人稍一提點，煲呔曾就輕裝簡從，呢度去嗰度去視察興建公屋用地。呢啲矯揉造作嘅醜態，不就是「平時不燒香，臨急抱佛腳」嗎？

這好比一對父母，平時從不好好照顧子女，長期吃不飽，面黃骨瘦，畀人喝一句，就畀餐好少少嘅佢食。試問咁嘅父母又怎叫做盡責？平時不理民間疾苦，待民怨谷爆、人民怒火街頭，才臨時掘井打水救火，咁搞法又怎會是個有效管治嘅政府？

上樑不正下樑歪，政府只愛搞形象工程，下面一干人等當然有樣學樣。例如東亞運超支搞出一盤混帳，德成局長明顯失職，被一眾議員狠批一味靠估亂撥數，仍死撐不肯問責堅拒道歉，仲要自吹自擂東亞運有幾成功，真係笑死人！政府充斥面皮咁厚嘅高官，試問香港怎能不沉淪？

夕陽政府氣數已盡，恍如一隻風乾的臘鴨，施政無能，號令不行，有的只是內耗不斷。朝中無能人，也無有承擔的人，只能繼續頭痛醫頭，腳痛醫腳，印印腳等收工，任你民生怨氣爆發至最後一秒都話之你，拍拍屁股走人，留下一攤爛泥，叫下一任收拾。