政情：許學之派扇賀盂蘭成功申遺
潮州人舉辦嘅「盂蘭勝會」月前成功被列入國家級非物質文化遺產，有份申遺嘅潮屬社團總會主席許學之開心過嫁女，除咗出紀念特刊作宣傳外，仲搵嚟國學大師詳述盂蘭勝會深藏嘅含義，特地趕製兩萬把絹扇，派畀城中「潮人」。
盂蘭勝會喺香港有逾百年歷史，但許主席慨嘆現今年輕一代忽略「盂蘭勝會」，以為係迷信風俗，冇重視其中派米扶貧、祭祀先人嘅孝道傳統。許主席又憶述，童年時喺家鄉過盂蘭節，遇上日軍侵華，處處饑荒、霍亂，街坊無錢醫病，惟有向蒼天祈福。呢一幕，至今仍深深印喺佢腦海。
許學之印製兩萬把絹扇派街坊，慶祝盂蘭勝會成功申遺。
「盂蘭勝會」成功列為國家級非物質文化遺產，潮屬社團總會乘勢出版紀念特刊。