政情：煲呔曾唔知醜踩立會民望低

莊嚴嘅立法會大堂，尋日竟然淪為鬥衰比醜嘅舞台。煲呔曾尋日落立法會出席本立法年度最後一次答問大會，第一個質詢就畀人民力量嘅黃毓民叫佢落台，煲呔曾有晒準備咁反擊，話立法會民望低同議員言行過激有關。公文袋黨魁梁家傑跟住質疑煲呔曾踩立法會民望低別有用心，跟住兩個加埋過百歲嘅人好似細佬仔嗌交咁，互指對方拖累另一邊民望插水，佢兩個知唔知醜㗎？

近期兩間大學公布最新民調，煲呔曾政府同立法會都雙輸，煲呔曾嘅個人民望同政府嘅信任度每況愈下，支持煲呔曾做特首嘅受訪者更早就跌破四成，民望亦唔合格好耐；立法會就仲衰，受訪市民話信任立法會嘅只得一成。

煲呔曾尋日落立法會公審，一早做定功課，立法會呢份咁羞家嘅民調自然畀佢攞嚟做武器，藉機反擊議員嗌佢落台，公文袋嘅梁家傑形容煲呔曾發言時，講到「立法會民望好低，沾沾自喜，兩眼發光……」跟住仲寸煲呔曾：「我哋（立法會）民望低唔代表你哋（政府）民望高！」

沾沾自喜死撐

畀人大番轉頭，煲呔曾梗係死撐：「議員唔好誤解（我）有沾沾自喜」，我只係擔心，因為立法會民望低，就會將政府嘅民望都拖跌，我好擔心立法會如果猛咁跌，會拖低我同我啲同事一齊跌！」呢句說話一出，議事堂即刻傳嚟恥笑聲同嘻笑聲，議員笑煲呔曾唔知醜，官員就笑嘻嘻好似執身彩咁。

煲呔曾同袋巾傑竟然夠膽死拗邊個係插水元兇，呢種冥頑不靈嘅態度真係令人冇眼睇。