政情：應家柏定期過大海攞料
澳門賭場一向係香港賽馬會嘅競爭對手之一，馬會行政總裁應家柏透露，近年佢哋不停睇住澳門嘅發展，包括參考各個賭業集團嘅年報，投資銀行對各個賭場嘅評級，當然仲有定期親自過濠江視察當地賭業嘅最新發展等。
馬會仲會搵人喺口岸搵港人賭仔做訪問，例如問吓受訪者幾耐過一次大海，仲有平均輸幾多錢咁，當然仲有搵人打聽外圍莊家有冇新招啦。講起外圍招數，應家柏爆料話，請飲請食已經係小兒科，啲莊家隨時可以向賭客提供百分之十五至二十大額折扣，近年更有莊家出動直升機送貴賓過澳門，都咪話唔巴閉！馬季煞科，應家柏計劃返歐洲探望父親，充完電返港再搏過喎。