政情：搞搞政：鼠王芬網上被揭臭史

專業會議立法會議員梁美芬（鼠王芬）呢排成為網絡紅人，自從「選民懲罰論」之後，佢就連日畀選民同網民鍥而不捨瘋狂狙擊，近日更展開網上搜尋，將鼠王芬過去嘅「劣績」貼上討論區，以捉鼠為人熟悉嘅梁美芬家吓真係處處遇伏擊，再唔救亡，就想救都難喇！

網民重提鼠王芬○九年反對政府修訂《家庭暴力條例》，話佢擔心政府會將條文寫成「同性同居者猶如婚姻關係」，建議就此另立新例，有關言論隨即被批評為「道德塔利班」。

網民又提到○九年大學生實習計劃爭議，當時鼠王芬支持建議，並指摘學生遊行反對計劃，冇珍惜機會。網民又追溯到○八年梁美芬參選立法會期間，一直向外堅稱自己為獨立、不群不黨嘅專業人士，但當時畀泛民主派候選人揭發佢獲工聯會支持。網民圍剿之勢未見停止，年底嘅區選同出年嘅立法會選舉，鼠王芬點算？