政情：張文光自爆立會見鬼

矗立於中區嘅立法會大樓暑假後將搬往添馬艦，現址變身終審法院。立法會議員尋日藉惜別動議緬懷大樓點滴。有人大爆「見鬼」，亦有人感嘆立會傳統今非昔比，有人眼紅紅、最多人動作一致嘅就係攞部手機出嚟當相機，跟住齊齊喺大堂內揮手拜拜！

教育界張文光笑笑口話，自己經常做到三更半夜，有次試過喺三樓工作房外游走，當時四周漆黑一片，只餘下電腦螢幕閃爍，見到有個和服女子現形，場面相當驚嚇，謎團至今仍未解開。富貴黨主席劉健儀就揶揄，港英年代嘅立法局向有敬老及論資排輩傳統，今時今日嘅立法會卻變成「冇大冇細」。

金融服務界詹培忠就話自己最犀利，因為佢係首位以議員身份入獄，前無古人後無來者。不過，佢死口唔認係坐監，只係話自己當年入去赤柱監獄係好好「休息」啫。噏得就噏嘅仲有工聯會嘅黃國健，立法會大樓頂豎立嘅泰美斯女神像，佢蒙住雙眼、手持天秤係寓意唔會被眼前事物蒙蔽，黃國健卻話，可能係女神唔想睇到立法會內粗口橫飛，唔想見到議員泥漿摔角，將來立法會變回法院後，就可以開眼見人喇！