短打長擊：民主黨危情時刻

俗語說：夫妻本是同林鳥，大難臨頭各自飛。用之於政黨內的政客亦然：黨員本是同林鳥，大難臨頭割席飛！

民主黨總幹事陳家偉背妻偷歡，一時狡辯係「訪談」，一時話要求鳳姐擺出各種性愛姿勢，目的係提點何謂安全性行為，例如點樣戴避孕袋。咁嘅理由都講得出，笑死人冇命賠！人哋戴套多過你食飯，成語「班門弄斧」就有啫，何曾有「班門弄套」？有民生問題唔去研究，卻研究點樣戴避孕袋、何謂安全性行為，連家計會個飯碗都想搶埋，唔通讀神學就要深入研究「神女」？

都話患難見真情，白鴿黨即時與偉哥劃清界線，未有舉行記者會，企圖淡化事件，這令筆者想起泰國前色情業大亨朱威．卡莫爾威斯特在競選國會席位時，向記者解釋一張競選海報（他抱着一個蹣跚學步的孩子）的意思：「政客就像尿布，需定期更換，否則就太髒了。」

網民反應真快，創意與時並進，即時把民主黨黨徽中的白鴿改成公雞，配上「相信民主黨，鳳姐無法擋」。民主黨中人，相信有不少是世衞總幹事陳馮富珍嘅粉絲，日日都食雞！正是：自古聖賢皆寂寞，惟有食雞留其名！

世態炎涼，偉哥出事，黨員無不「大難臨頭割席飛」，有人站在道德高地，恍如撫琴聽高山流水，然後一臉正氣說：「有咩問題就剖腹。」亦有黨員形容陳家偉只是職員而非議員或公職人員，「市民分得清係佢一個人做錯，而非民主黨做錯」。呢個世界就係咁，對弱者就「拳頭在近」，對強者就「要講道理」，是以奸黨歷來為患不絕！