SUN世代：飲食橋王靠腦掘金

讀書少，必定失敗？梁震宇（Edmund）只有中五學歷，但他發揮香港人食腦、拚搏精神，終由一個小小廣告銷售員，搖身一變成為飲食界無人不識的大老闆。貴為飲食天王ＣＥＯ，仍百足咁多爪，賣廣告、搞食肆、辦飲食界頒獎禮，最近更粉墨登場，做飲食界棟篤笑，無時無刻創造驚喜。談到成功之道，他說：「只要深信自己做嘅嘢係好，大膽去試就得！」

這是一個窮小子變成有錢人的故事。Edmund堪稱是飲食業界翹楚，原因並非他煮得或食得，而是度橋得和口才得！他家境清貧，在單親家庭長大，讀書成績不出眾，中五畢業後，他於一間專接小巴車身廣告的廣告公司任職，以為可以搵兩餐，某天，老闆卻告訴他：「公司唔掂，呢個月無糧出。」Edmund突然靈光一閃，腦中度到一條絕世好橋，「我哋免費幫食肆喺小巴賣廣告，對方畀雙倍現金券當廣告費，我哋以七折賣券，賺取差價。」

電視飲食廣告賺第一桶金

Edmund成功說服老闆採用他的「橋」，數年間，他成為公司最top的銷售員，他回想起步初期，殊不容易，「逐間酒樓去叩門，除咗要三吋不爛之舌，仲用誠意打動佢哋，有咩飲食商會飯局都去識人，實行一網打盡。」

一心在商界殺出一條血路的Edmund，決定自立門戶。九九年，他與朋友成立亞洲傳奇廣告有限公司。眼光獨到的他，覷準電視台的深宵廣告時段具商機，遂為食肆包辦廣告，食肆以現金券付廣告費，結果「活化」該時段，「目標係將飲食廣告提升到電視層面，呢樣嘢喺業界係創先河。」那一役， Edmund已掘到人生第一桶金，當年他只有三十二歲。

事業看似一帆風順，競爭卻愈來愈大。二○○○年，他想趁科技熱潮建網頁為食肆現金券造勢，豈料科網股爆破，努力化為烏有，虧蝕離場。○四年，他重整旗鼓，與朋友合資組成「飲食天王」，大搞飲食業廣告代理，並將飲食現金券的賺錢方法發揚光大。兩年後，他又有新「橋」，就是首創飲食界奧斯卡，向首屈一指的食肆加冕為「天王」食府。「依家搞到第七屆，喺行內有咗認受性，已經搞到去廣州，希望有朝一日喺中央電視台舉辦《飲食天王頒獎典禮》！」

從商期間，Edmund不乏遇上驚濤駭浪，但他積極迎戰，未有後退，「做生意最緊要唔怕醜，夠大膽。好似我咁，讀書唔多，三十歲先開竅，日日刨政經新聞，識多啲人，識多啲嘢，堅持做覺得好嘅嘢，就會成功。」

Edmund's Profile

現職：飲食天王（控股）有限公司

　　　大中華業務首席執行官

學歷：中五畢業

公職：廣東省餐飲服務行業協會

　　　名譽副會長

興趣：養馬、籃球、高爾夫球