政情：鼠王芬班臨記撐自己

專業會議立法會議員梁美芬（鼠王芬）因發表「懲罰選民論」同搶先派單張抽水事件，搞到被全城圍插，佢日前出招救民望，喺facebook貼張支持者到立法會門外撐佢嘅相，可惜大部分粉絲都用紙遮住塊面，好似唔見得人咁，只有一名印巴裔男粉絲「露全相」，仲隨即畀人起底係電影臨記，搞到鼠王芬呢幕自救大戲，蒙上畀錢請臨記嘅疑雲。

正當網民關注之際，尋日就有位聲稱係相中人嘅印巴裔男粉絲主動打電話嚟東方報業集團，自稱叫陳振華（Ricky），今年二十八歲，正職係髮型師，曾經拍攝電影《機動部隊—伙伴》，強調自己唔係臨記，而係特約演員。我哋叫佢自拍一張相嚟證實係同一個人，點知佢話唔記得自己個電郵係乜，仲話前日有個朋友無端端打電話畀佢，叫佢去立法會撐鼠王芬，聲稱鼠王芬關心少數族裔喎，所以佢咪去囉。

最令人奇怪嘅係，對於呢次撐鼠大行動，鼠王芬話唔想多回應，但矢口否認自己有畀錢請人支持自己，其他嘢唔想講太多，總之叫大家畀啲空間佢。依家佢嘅直選席位畀幾方勢力吼住，尋日立法會內都有單路邊社消息，話鼠王芬尋日喺立法會前廳偷偷飲泣喎！