政情：搞搞政：金勞詹等級論辣慶律師
立法會金融服務界代表「金勞詹」詹培忠好惹火，喺立法會爆過好多金句，尋日佢又喺發言期間講到葛輝事件，講講吓竟然講到律師可以分三個等級，資深大律師係第一等，排第二嘅係大律師，排最尾至係律師。呢個律師等級論一出，搞到立法會內幾個律師同事好不滿，連本身係律師嘅徒弟阿Paul謝偉俊都非常不滿。
徒弟阿Paul大反擊
同師傅一向默契十足、互相支援嘅阿Paul，尋日聽完金勞詹嘅說話後，即刻按捺不住，發言時大反擊，講到唔敢苟同金勞詹嘅說話，因為大律師之所以「大」，只係因為佢哋並非事務律師，但地位同律師無異，兩者根本冇高低之分。同樣有律師身份嘅富貴黨主席劉健儀亦反駁，澄清自己唔係三等律師，而係一等律師。
