民建聯借陳家偉揶揄民主黨

【本報訊】民主黨原總幹事陳家偉日前被揭發到鳳樓偷歡後，「潛水」兩日未曾現身，但已累及涉事及鄰近的鳳姐無工開。民主黨昨日則繼續低調處理事件，企圖淡化對未來幾場選舉的影響。不過，其主要選舉對手民建聯則開始發功，借辯論其他議題時揶揄民主黨人召妓。

本報記者昨再到陳家偉位於藍田康柏苑的寓所追訪，惟未見他出入，多次按大廈對講機無人接聽。

香檳大廈陀地區冚旗

大廈保安員說：「唔使按啦，一早出咗去！」致電其手機亦一直無人接聽。事件引起街坊議論紛紛，批評陳作為公眾人物不潔身自愛，有街訪不諱言：「男人叫雞好正常，衰在佢係公眾人物！」

另有街坊表示，陳大模廝樣出入鳳樓，做法好蠢，應該戴口罩以防被人認出。

事件令香檳大廈陀地區無啖好食，全線冚旗無開工。記者昨重返事發的香檳大廈四樓陀地區，發現水盡鵝飛，鳳姐「婷婷」架步多次按鐘無人應，隔籬五間鳳樓亦無開工。

據悉，事件令「婷婷」熱爆香檳大廈，惹來大批記者追訪及嫖客光顧，她與鄰房姐妹不勝其擾，避走鳳樓暫避風頭。同廈其他鳳樓則不受影響，但亦有大漢不時巡視。

此外，身兼行政會議成員的民建聯副主席劉江華，昨於立法會辯論葛輝事件時，突然提起陳家偉醜聞：「難道民主黨有一、兩個成員去嫖妓，就推論成個政黨都係咩？」惟與會的民主黨議員全部裝聾扮啞、毫無反應或回應。