政情：八和科大開粵劇課程
日前八和會館改選新一屆嘅理事會，由「阿姐」汪明荃蟬聯理事會主席。眾所周知，阿姐做事好認真，喺互選會後就即刻召開新一屆理事會會議，佢仲話粵劇近年日益受到重視，正係加快推動各類粵劇傳承工作嘅最好時機。咁又係呀，八和最近嘅計劃多多，同職業訓練局匯縱專業發展中心簽訂「粵劇培訓及發展計劃」，又已經申請康文署「場地伙伴計劃」，希望將油麻地戲曲活動中心打造成粵劇新秀嘅搖籃。
佢哋一向致力喺學界推廣粵劇藝術教育，新學年喺個別中學為中一、二嘅學生開設粵劇常規課程，仲會殺入大學添！邊間？咪就係科技大學囉！佢哋會開辦「粵劇藝術概論」課程，成為科大一年級學生通識課程嘅其中一個項目，藉以助大專學生加深對粵劇藝術嘅認識。
阿姐（中排左五）蟬聯八和理事會主席，話會加快推動各類傳承工作。