政情：搞搞政：三散人高危座位捱掟
日前講過立法會新大樓會議廳嘅議員座位編排，新民黨主席葉劉淑儀被迫同掟嘢三人組、即人民力量黃毓民、陳偉業同社民連梁國雄為鄰。原來新大樓仲有另一套議員座位表，就係將來用嚟開財務委員會同內務委員會嘅一號會議室，各黨派坐法同開大會用嘅會議廳有啲分別，今次變咗工聯會四子坐喺掟嘢三人組隔籬，估計將來一定會擦出火花。
根據座位安排，坐得最近嘅係王國興，其次係過往多次同三人組口角嘅黃國健。其實不論係會議廳或一號會議室，如果三人組掟起嘢上嚟，最危險嘅唔係坐側邊嘅議員，而係坐前面嘅「五散人」，當中以廠商會林大輝、資訊科技界譚偉豪同保險界陳健波食得最應，隨時要帶定把遮或頭盔開會，否則就惟有寄望三人組掟嘢力度夠兼掟得準，唔好誤中副車！
