政情：樓神冇時間申請iBond

政府推出同通脹掛鈎嘅債券iBond，應該會吸引到好多想保本嘅小市民申請，但勢估唔到連長實執行董事兼置富產業信託主席、有「樓神」之稱嘅趙國雄都有興趣，佢主動問記者會唔會買iBond？仲話自己好想買，但呢排成日飛，前晚至返香港，呢兩朝七、八點就要返公司做嘢，然後又接住飛新加坡推介長實喺當地嘅樓盤，到下禮拜中至返，根本冇時間去銀行搞手續。

唔畀阿女知有幾多身家

咁叫阿女趙宇幫手申請啦，點知佢話唔得，因為怕洩漏自己有幾多身家畀個女知，仲笑住話阿女成日吼住佢份身家。佢咁講，即時引嚟哄堂大笑。

置富產業信託品牌重塑，樓神同趙宇貴為主席同副行政總裁，尋日拍住搞宣傳，新嘅品牌叫「置富Malls」，仲設計咗新嘅標誌，希望以新嘅品牌策略同形象標誌去統一經營旗下十四個商場。趙宇解畫話新嘅標誌好似一大一小兩個星球，部分重疊寓意唔同嘅群體走埋一齊，就好似佢哋嘅商場同社區保持和諧融洽嘅關係。雖然所有商場嘅logo一樣，但有分唔同顏色，以示識別。