政情：立會演擁唐鬧劇

立法會尋日有條質詢關於政務司司長唐唐偷步競選事件，出席嘅官員話由始至終唐唐只得一個網頁，官方以外嘅嘢不予置評。

到咗有關政府民望嘅質詢，唐唐終於現身，但議員明明係質問佢政府民望愈嚟愈低，有冇檢討過幾年嚟嘅施政過失同埋會唔會向公眾道歉，「條條fing」嘅唐唐唔單止冇正面答，仲夠膽死話過去幾年同七百萬市民同舟共濟，喺驚濤駭浪中保持香港金融體系同經濟社會穩定。其實政府有呢班官員掌舵，市民至真正喺驚濤駭浪中生活！

跟住「擁唐大龍鳳」正式開始，率先上場嘅經濟動力劉皇發，問唐唐餘下任期會唔會聽取民意，之後工總出身嘅梁君彥問佢點樣改善行政立法關係，兩條問題擺明畀位佢上；再嚟係有唐唐「家臣」之稱嘅林大輝壓軸登場，問佢到底近期有冇落區，唐唐更加好似發咗達咁，話過去做咗好多「以民為本」嘅事，仲自爆過去兩個禮拜都有去探劏房居民，只係冇喺鎂光燈下進行，暗寸另一疑似對手、行政會議召集人梁振英次次落區探籠屋居民，都喺鏡頭面前表演。

喺眾目睽睽下，佢同班擁唐派議員一唱一和，好似借立法會呢個公眾場合發表疑似政綱，睇嚟又喺度偷步用公帑競選！