政情：宏利委李哲恒銷銀保

宏利尋日公布三項人事任命，當中有一個好熟悉嘅名字，就係Alvin李哲恒，佢嘅職位係機構經銷部副總裁。相信大家都記得，Alvin就係幫恒生保險搞得有聲有色、舊年至離任嘅恒生保險前行政總裁。

仲記得金融海嘯後，Alvin睇準當時市場大賣嘅投資相連保險，好可能會受股市波動所拖累，所以大力主張恒生主攻人壽保險，令恒生成為○八年本港新造保險一哥。

佢嘅新工作係專責宏利產品喺本港機構嘅經銷渠道事宜，例如銀行、經紀同獨立理財顧問等，以及相關嘅市場推廣同後勤部署，相信佢應該勝任有餘。

依家保險公司愈嚟愈注重銀行嘅分銷渠道，除咗今次宏利講到明要強化機構經銷渠道，委任對銀保有豐富經驗嘅Alvin外，前排友邦都委任咗林昶恒做副總裁兼銀行保險部主管，加埋近幾年表現好好嘅中銀人壽、滙豐保險，相信未來保險市場又有一番龍爭虎鬥。