政情：議員推介居屋靚地 林鄭唔領情

基層市民嗌到拆天要求政府復建居屋同加快起公屋，但政府採拖字訣點都唔肯做，偏偏港澳辦主任王光亞訪問完港澳之後，呢個夕陽政府就轉口風，但仍然跌落地執番揸沙，仲大番市民話起居屋要七年。

尋日多名立法會議員喺議事廳扭盡六壬，畀晒好橋好地政府快啲起樓。首先係建仔嘅陳克勤提出質詢，話上水石湖墟污水處理廠附近，同埋文錦渡路旁虎地坳村一帶，各有一幅原先用嚟做中央家禽屠宰中心嘅地，依家政府決定咗唔起中心，兩幅地又丟空咗五年以上，何不用嚟起公屋呢？克勤仔黨友張學明更提議，不如用唔影響到自然生態嘅綠化地帶起樓啦！

夕陽政府翹埋雙手

專業會議嘅「大舊石」石禮謙亦話，好多嘢都係事在人為，好似西鐵上蓋有唔少熟地，政府大可唔好賣，攞嚟起居屋，最多咪唔見少少錢。

大家畀完一大堆建設性建議，但發展局局長林鄭月娥一啲都唔領情，當係耳邊風之餘，仲猛踩上水同文錦渡兩幅地受氣味同噪音影響，加上嗰度冇交通配套，仲話上水幅地已經打算用短期租約出租，寧願做巴士廠、停車場等，都唔會起公屋幫市民。

至於西鐵上蓋呢，林鄭突然謙稱大舊石抬舉佢，事關佢只負責土地資源，再者煲呔曾都話咗施政報告會回應居屋啦，即係將個波交番畀煲呔曾。最後綠化帶嘅問題，林鄭就賴如果唔小心處理，環保人士實會嘈得好緊要，總之一年內做完相關檢討啦。

議員一片苦心，提咗咁多建議畀政府，林鄭竟然化身百彈齋主，對各方提議嫌三嫌四，全部擋走晒！仲話以民為本、急市民所急喎，夕陽政府班高官根本喺度翹埋雙手唔做嘢等收工就真！