政情：王雪紅靚衫贏喬布斯iWear

兩隻鬥得最犀利嘅手機品牌—蘋果同HTC，佢哋嘅老闆除咗熱衷工作，仲有一個相同之處，就係唔使為着乜衫而煩惱。蘋果執行長喬布斯十年不變嘅打扮畀網友叫「iWear」，而鍾情黑西裝嘅HTC董事長王雪紅，就以色彩鮮艷嘅恤衫小勝一仗。

喬布斯永遠係黑色冷衫、Levi's 501牛仔褲同NEW BALANCE 991波鞋，呢個款式一着十幾年。以前喬布斯着美國黑色高領羊毛衫，每件兩百美元有交易，自從蘋果電腦股價上揚，佢都升級改着德國VonRosen、意大利Brunello Cucinelli訂製嘅毛衫，每件貴咗兩至四倍。聽講喬布斯每年定期上門訂製，一口氣就要五十件。

至於王雪紅嘅特色係着黑色西裝，再搭唔同顏色嘅Ｖ領絲恤衫。佢唔鍾意shopping、唔跟潮流，就算着名牌嘅價錢都偏向大眾化，佢會着Armani、Gucci西裝，買恤衫就一口氣要唔同嘅顏色。比起喬布斯，王雪紅已經算係有少少變化嘞！