政情：搞搞政：賄選案乾塘 Mandy電郵撲水

立法會前會計界議員Mandy譚香文喺○五年政改一役，被吹捧成「民主女神」，但其後○七及○八年卻先後輸掉黃大仙區議會同立會議席、黯然退出公文袋，早前更被控透過搞講座拉票賄選。

尋日有人收到一封署名Mandy嘅電郵，話佢本來用作服務社區嘅資源，都已投入有關賄選嘅訴訟，因此要向支持者尋求捐助搞社區服務，並隨郵附上由佢創立嘅鑽石山居民協會銀行戶口號碼。政界人士搞晚宴或喺街頭籌款就見得多，求其發個電郵就想人捐錢就好少見，仲要連戶口號碼都公開埋，收件人就懷疑Mandy係咪又畀人惡搞。

我哋搵過Mandy查證，原來封電郵真係佢發出嘅。佢否認山窮水盡，但承認要同時應付官司同地區工作好辛苦，希望各方好友幫幫忙。對於有傳工聯會前立法會議員陳婉嫻會空降Mandy嘅區會選區，搵佢祭旗再參選超級區議會，Mandy話至今都未見過嫻姐落區，就算係都未驚過喎！