政情：蘇錦樑fb對話一味廢噏
特首辦搞嘅社交網站facebook上搞官民對話好幾次，但鋪鋪都係叫副局長出嚟頂，尋晚終於派個「次貨局長」、櫈都未坐暖嘅商務及經濟發展局局長蘇錦樑出嚟獻醜講競爭法。
呢個「時事Q&A」話就話叫對話，但係由主持讀出問題，網民想問啲尖銳問題都唔得，莫講話同蘇錦樑有關嘅卡片風波同國籍等問題，就連回答競爭法嘅提問都交行貨兼冇料到。有網民問佢油公司夾埋一齊加價或減價，算唔算合謀定價，佢就耍太極話好難作個別評論，最後更拋個波畀競爭事務委員會，話由該會判斷先可以作準喎。環節到最後嗰十分鐘，佢仲同主持人喺度吹水添。