政情：派錢安排低能 煲呔曾虐老

夕陽政府hea住做，派發六千元安排慢吞吞不特止，要市民登記唔直接喺銀行過戶嘅做法更加係超低能，各界都預言到一大批老人家會喺首日登記嗰日湧晒去銀行排隊，唔好彩嘅分分鐘跪低幾件。

下月二十八日係六十五歲或以上老人家首日向銀行登記派錢，理應最關注件事嘅財爺鬍鬚曾，即使喺上周五到立法會財委會申請撥款咁大件事，佢都係懶理仲卸畀下屬財經及庫務局局長「傻強」陳家強幫佢擋箭。鬍鬚曾最近更變本加厲，以訪問為名避走加拿大，完全唔理會派錢前嘅最後準備安排，最終當然就係搞到依家派錢嘅安排唔湯唔水喇！

市民提出九招應變

有市民對呢個夕陽政府「超錯」派錢安排好不滿，直接向煲呔曾提出九招「派錢災難應變措施」，教埋佢哋點做，做咁多嘢講到尾都係想盡量將傷亡數字減到最低。該名市民首先點出，由於個別舊區長者排隊人數較多，銀行應盡量安排佢哋坐喺有遮蔭嘅地方等候，同時又熱又凍身體較差嘅長者好易暈倒，佢又呼籲銀行將冷氣校細少少。

夕陽政府派錢派到「超錯」，或多或少都可能會刺激老人家嘅情緒。該名市民認為，應該臨時增加急症室人手，骨科、心臟科及腦科醫生等都應取消休假，而如果遇到急需要錢、情緒激動嘅長者，都應該盡量安排佢哋同社工見面，警方應避免使用武力喎！

該名市民最後話，呢個史無前例嘅創舉將記載喺香港歷史文獻上，包括埋傷亡數字，係名留青史定係遺臭萬年只係一念之差。咁即係警告煲呔曾若果派錢派出禍，必定全城圍剿，遺臭萬年。