政情：搞搞政：陳新滋募捐還酒樓債

浸大酒樓聯福樓上月執笠，到依家都仲拖欠幾十個工友遣散費同假期補水合共八十幾萬元。監察團體「浸大外判監察」尋日同飲食及酒店業職工總會，同埋一班工友去立法會示威，要求校方代支欠薪。班工友話校方外判服務唔等如冇責任，批評校方唔動用聯福樓之前擺低嘅按金畀工人係推卸責任。

浸大校方有苦自己知。據了解，校方之前發還咗一半按金畀聯福樓承辦商，等佢哋可以發放六月份薪金畀工友，但剩番嘅一半根本唔夠畀承辦商拖欠緊大學嘅水電煤費用，如果畀埋工友，即係變相要大學自己用資金補番嗰啲水電煤開支，大學係公營機構，當然唔可以用公帑補貼外判商。

左右做人難，校長陳新滋尋日惟有發電郵畀全校師生解釋件事來龍去脈，又話喺唔動用大學資金嘅原則下決定發起募捐行動，佢同幾位副校長，財務長已身先士卒捐咗，呼籲大家齊齊捐錢協助工友。不過，浸大外判監察就唔係咁睇，批評校方「私吞」餘下按金，再以他人捐款抵償自己未盡之責，係貓哭老鼠咁話喎！