政情：王冬勝任滙豐中國董事長
鄭海泉喺五月尾，滙豐控股開埋股東會後就正式退落嚟，獅子銀行尋日公布一項新人事任命，就係委任Peter王冬勝出任滙豐中國董事長。
身兼滙豐中國董事長嘅Peter話，內地係帶動全球經濟增長引擎，亦係滙豐新興市場戰略核心所在，期望憑藉自身品牌優勢，進一步提升作為外資行喺內地嘅領先地位。
集團行政總裁歐智華今年初正式上任後，隨即重訂發展策略，仲大鑼大鼓搞咗個投資者策略日，亞洲區業務策略簡報更加係壓軸登場，歐智華唔止一次公開大讚Peter打理亞太業務做得非常出色，就連大班屋亦都讓出畀Peter入住，可見Peter地位非同凡響。
