西九文化區蹉跎多時,依家總算有番啲眉目,尋日半年試用期剛滿嘅西九M+博物館行政總監李立偉(Lars Nittve),上晝去咗立法會講M+,晏晝同傳媒又係講M+,佢希望M+成為本地藝術家走向世界嘅平台,同埋一個教育設施。
不過一問佢會唔會畀內地維權藝術家艾未未嘅作品擺喺M+,佢就好斬釘截鐵話得,因為佢相信法治、自由係香港嘅基礎,所以絕不接受任何審查,若然因為咁而唔畀佢展覽某樣嘢,佢會立即執包袱走人。李立偉果然夠勇!