政情：郭炳聯培育80後作家

新鴻基地產連續第三年資助「年輕作家創作比賽」，培育下一代作家，新地副主席兼董事總經理郭炳聯更親自出嚟宣傳，見佢心情靚爆。

呢個比賽過去已成功資助咗多位具潛質兼有志成為作家嘅年輕人出版第一本書，今年佢哋亦都繼續請嚟多位專業嘅資深創作人挑選，仲個別指導參賽者，最後選出八位得獎者，帶佢哋踏上作家之路。

今年比賽反應熱烈，一共收到一千二百份參賽作品，參賽者由八歲至四十歲都有，最後得獎嘅八位作家全部都係「80後」，創作形式包括漫畫、散文、小說，題材亦都變化無窮，由克服紅斑狼瘡症嘅經歷至戲院兼職嘅趣怪見聞都有。

郭炳聯話佢哋嘅成功，令佢深信香港新一代潛力無限，佢亦都多謝擔任評審嘅創作人，話一個好嘅師傅對年輕人成長好重要，又宣布成立一個「年輕作家同學會」，邀請所有得獎作家加入，期望佢哋第日可以為培育後輩出一分力。