政情:劉健儀轟唐唐遲交功課懶改

立法會快抖暑,又係時候同政府埋單計數,總結政府過去一年嘅表現。立法會內務委員會尋日就力數政府三宗罪,包括唔交齊草案畀立法會審議,內會主席Miriam劉健儀批評政府多年來屢勸不改,更警告政務司司長唐唐,如果下年度一次過「隊晒」啲草案要求立法會審議,立法會有權打回頭,叫政府返屋企,實行拒絕審議。

Miriam尋日同內會副主席李華明齊齊發炮,不滿政府龜速向立法會提交法案。原來政府今年度一復會,承諾會提交一共二十三條草案,供立法會審議。結果政府只提交咗二十條,違反承諾不在話下,提交嘅二十條草案中,七成草案都係下半年先交上立法會,其中四條仲要喺今個月先交到,叫立法會點樣有時間審。

派低級官敷衍立會

Miriam話已經唔係第一次批評政府呢個遲交功課嘅問題,「次次都搞到立法會最後踢晒腳!」所以佢未來每次見到唐唐,都會向對方投訴呢個問題。

三條未交上立法會嘅草案,負責嘅決策局藉口不外乎條例涉及課題多、要諮詢持份者意見,但早前替補機制,政府快刀斬亂麻,慌死立法會落閘表決唔到。政府雙重標準,莫過於此。所以Miriam都話政府想壓縮有關替補機制的討論,係唔會得逞!因為民意根本過唔到關。

佢又批評政府派出低級官員敷衍立法會,好似早排有個委員會討論運輸業界買唔到保險,但係由話唔到事嘅官員嚟應酬立法會,「官員嚟到竟然話自己唔係負責呢瓣,話係嚟聽下個會喎!咁即係點!」

上年立法會就擴建堆填區成功廢法,佢話知道政府喺呢件事唔多高興,條氣唔順到想司法覆核,同立法會喺法庭開片,最後都係腳仔軟唔敢。佢話呢啲行為令行政立法關係好緊張,都係政府一手造成。

「Money18免費即秒股票報價網站」現推出8升級功能,財經資訊,實時實發!

再遲交我就唔審!