政情：鞋癡Mandy遊意學做鞋

名模Mandy Lieu啱啱結束兩星期嘅意大利之旅，期間佢順道參觀咗一直心儀嘅Ferragamo的鞋廠，好興奮咁話：「大家都知我係一個鞋癡，所以今次有機會參觀佢哋嘅鞋廠，真係好開心！喺嗰度仲識咗個鞋匠Stefano，佢仲教我點做鞋，原來一對鞋要用一百二十個鐘頭嚟做，真係學識好多嘢！」

此外，佢又相約喺英國當醫生嘅同學仔一齊玩，仲特別租咗架直升機睇火山遺址，佢話：「坐直升機都好貴，一個人要二百歐羅，之前又去睇歌劇，雖然貴，但覺得好值得。今次呢個trip感覺好似電影《Eat Play Love》裏面嘅女主角咁，周圍吃喝玩樂，又着三點式游水，好開心！」咁Love係咪代表有艷遇？佢話：「Love可以係友情，就冇艷遇，不過去到Sienna就撞到一班羅馬球迷，佢哋仲帶我去球場睇波，又教我點樣唱支持球隊嘅歌，不過睇到一半，支持嘅球隊應該會輸波，佢哋心情都唔係咁好，所以我靜靜雞走咗！」佢仲話下一站最想去嘅地方就係印度喎！