政情：肥仔張窒羅范教改最勇
教育統籌局前常任秘書長、港區全國人大代表羅范椒芬，尋日出席由自由之友搞嘅「子女成才之路入學篇」講座，講座喺拔萃男校舉行，主持係富貴黨立法會議員「肥仔張」張宇人，因為佢係男拔嘅校友。
現場所見，家長發問好踴躍，有家長提到政府喺教育政策上成日改嚟改去唔知點算，搞到好擔心，跟住肥仔張就笑笑口話，教育政策改得最多就係羅范嗰陣，所以家長依家唔使咁擔心，意思即係話要改都已經改咗喇。說罷，羅太立即收起笑容笑唔出，真係言者無心，聽者有意。
羅范就話教育政策經常改佢都無能為力，因為係關乎政治體制，但佢都認為政府應該要有長遠規劃。佢又話教育方面改得最多都係母語教學時。
羅范椒芬（左）講到教改即收起笑容，右為張宇人。